د هند په ختیځ ایالت لوېدیځ بنګال کې د هندوانو ملتپال ګوند (بي جي پي) د ټاکنو تر ګټلو وروسته سیاسي تاوتریخوالی زیات شوی دی.

پولیسو ویلي، د هند په لوېدیځ بنګال کې پر موټرسایکلونو سپارو وسله والو د واکمن هندوانو ملتپال ګوند پر یوه سیاسي همکار برید کړی او وژلی یې دی. دا پېښه څو ورځې وروسته له هغې رامنځته شوه چې دغه ګوند په ایالتي ټاکنو کې بریا خپله کړه.

د لومړي وزیر نریندرا مودي بهارتیا جنتا ګوند (بي جي پي) د لوېدیځ بنګال په ختیځ ایالت کې، چې تر ۱۰۰ میلیونو زیات نفوس لري، د اسامبلۍ له ۲۹۴ څوکیو څخه ۲۰۷ یې وګټلې، چې دا په دغه ایالت کې د دغه ګوند لومړنۍ بریا ده.

چندرنات رات، چې ۴۱ کلن و او د لوېدیځ بنګال د بي جي پي مشر سوېندو ادهیکاري نږدې همکار و، د چهارشنبې په شپه ناوخته په کلکته کې خپل کور ته نږدې په ډزو ووژل شو.

ادهیکاري، چې په ایالتي اسامبلۍ کې د اپوزیسیون مشر دی او اوس تمه کیږي چې د ایالت اعلی وزیر شي، دا پېښه یې "په سړه سینه وژنه" وبلله.

موټرسایکلونو د "رات" د موټر مخه ونیوله مخکې او پر هغه يي مخامخ ډزې وکړې.

د لوېدیځ بنګال د پولیسو مشر سیدهـ نات ګوپتا د پنجشنبې په ورځ وویل: "دا پيښه  د چهارشنبې شپې شاوخوا ۱۱ بجې رامنځته شوه — هغه موټرسایکلونه چې د رات د موټر مخه یې نیولې وه، ضبط شوي دي."

"موټرسایکلونو جعلي نمبرپلېټونه لرل، او موږ د بریدګرو په لټه کې یو."

په اپولو روغتون کې یوه ډاکټر، پریتام سینګپتا وویل، چې "رات" "په سینه کې د مرمیو د ګڼ شمېر ټپونو له امله مړ راوړل شوی و."

د دوشنبې په ورځ د پایلو تر اعلان وروسته، د دې وژنې سره د وژل شویو کسانو شمېر لږ تر لږه پنځو ته ورسېد..

پر لوېدیځ بنګال له ۲۰۱۱ کال راهیسې د مودي سخته منتقده او سیاله ممتا بنرجي د اعلی وزیرې په توګه واکمنه وه.

بنرجي، چې د سیمه ییز ګوند آل انډیا ترنمول کانګرس (TMC) مشره ده، په ټاکنو کې یې خپله څوکۍ هم وبایلله او پایلې یې رد کړې دي.

شنونکي وايي چې په دې بنګالي ژبې ایالت کې د بي جي پي بریا د مودي لپاره له ۲۰۱۴ کال راهیسې چې لومړی ځل لومړی وزیر وټاکل شو، یوه له تر ټولو مهمو بریاوو څخه ده، چې د شمالي او مرکزي هند له هندي ژبو سیمو څخه یې واکمني پراخه کړه.

دې وژنې په ایالت کې سیاسي کړکېچ نور هم زیات کړی، او بي جي پي او ټي اېم سي د پایلو راهیسې د وژنو په اړه یو پر بل تورونه لګوي.

د بي جي پي د لوېدیځ بنګال مشر سمیک بهټاچاریا وویل: "دا یوه پلان شوې وژنه وه."

هغه تور ولګاوه: "له ترنمول کانګرس څخه همدا تمه کېده. دوی د دې مرګ مسؤل دي."

ټي اېم سي په دې ډزو کې هر ډول لاس لرل رد کړي، خو پر بي جي پي یې تور لګولی چې د دوی ملاتړي په نښه کوي.

دغه ګوند په یوه اعلامیه کې ویلي: "موږ د چندرنات رات وحشیانه وژنه په کلکه غندو،" او زیاته یې کړه چې دوی د ټي اېم سي پر غړو بریدونه هم غندي چې "ادعا کیږي د بي جي پي ملاتړو شر غوښتونکو له خوا ترسره شوي."

بي جي پي ګوند ویلي چې د شنبې په ورځ به خپل مشر ته د اعلی وزیر په توګه د لوړې مراسم پر ځای کړي.