پاکستان وروسته له هغه چې د محمد شريف الله به نامه هغه کس چې امریکا يې د ۲۰۲۱ کال د کابل په هوايي ډګر کې پر امريکايي ځواکونو د بريد مسئول ګڼي په نيولو بريالی شو له واشنګټن سره د ترهګرۍ ضد همکارۍ د بيا پيلولو اعلان وکړ. نوموړی د افغانستان پولې ته څېرمه په يوه نظامي عملياتو کې ونيول شو. د پاکستان لومړي وزر دغه بيان څو ساعته وروسته له هغې خپور شو، کله چې د امريکا ولسمشر ډونلډ ټرمپ د کانګرس غونډې ته د وينا پر مهال له پاکستانه مننه وکړه. ټرمپ وویل چې شريف الله يې نيولی دی، او زياته يې کړه چې نوموړی اوس عدالت ته د تسلیمولو په موخه امريکا ته رراوړل کیږي.

د FBI مشر، کاش پټېل، وروسته پر ايکس يو پوسټ وکړ او ويې ويل چې شريف الله د امريکا په ولکه کې دی، ترڅنګ يې د هغو اجنټانو عکس هم خپور کړ، چې د هغه د راتګ لپاره ټاکل شوي الوتکې مخې ته ولاړ وو. "موږ به د سيمه‌ييزې سولې او ثبات د خوندي ساتلو لپاره له امریکا سره خپلو نږدې همکاريو ته دوام ورکړو," دا خبره د پاکستان لومړي وزیر شهباز شريف د ټرمپ د وينا څو ساعته وروسته په يوه بيان کې وکړه.

پاکستان د افغانستان پولې ته څېرمه عمليات پيل کړي وو، ترڅو شريف الله ونيسي. شهباز شريف نوموړی يو افغان وګړی او د داعش خراسان ډلې (داعش-K) يو لوړپوړی قومندان وباله. د پاکستان لومړي وزیر وویل چې "موږ د امريکا له ولسمشر ډونلډ ټرمپ څخه مننه کوو، چې د ترهګرۍ ضد هڅو کې يې د پاکستان رول او ملاتړ ستاینه کوي," د افغانستان لنډمهاله حکومت بیا د ټرمپ لخوا د پاکستان د ستاینې په غبرګون کې وویل ، د پاکستان په خاوره کې ددې شکمن کس نیول پخپله ددې ښکارندويي کوي چې د داعش هډې پخپله د پاکستان په خاوره کې دي.

‘غوره همکاري’

د اسلام‌اباد او واشنګټن ترمنځ تل بدلېدونکې اړيکې د افغانستان د طالبانو واکمنانو ته د پاکستان د ادعا شوې ملاتړ له امله خرابې شوې وې. که څه هم پاکستان دغه ملاتړ رد کړی، خو له واشنګټن سره يې اړيکې خرابې شوې، پداسې حال کې چې د پاکستان سيال هند په سيمه کې زيات نفوذ ترلاسه کړی.

يو پاکستانی امنيتي چارواکی، د نوم نه‌ښودلو په شرط ، وويل چې د شريف الله نيول د پراخو ګډو ترهګرۍ ضد هڅو يوه برخه ده. “د پاکستان او د ولسمشر ټرمپ د نوې ادارې ترمنځ ډېره ښه همکاري رامنځته شوې ده,”

د ۲۰۲۱ کال د کابل هوايي ډګر بريد کې لږ تر لږه ۱۷۰ افغانان او ۱۳ امريکايي سرتېري ووژل شول، دا برید پداسې حال کې چې امريکايانو او افغانانو د وتلو هڅه کوله، او د تیښتې په هڅه کې وو ترسره شو. د دغه بريد مسئوليت داعش-خراسان، چې د داعش ډلې افغان څانګه ده، منلی و.

د امريکا د عدليې وزارت پر شريف الله تور لګولی چې “داعش ډلې ته يې مادي ملاتړ او سرچينې برابرې کړې او د دې برید طرحه يي جوړه کړې وه .”