د امریکا سواحلو ته نږدې د مکسیکو د سمندري ځواکونو د الوتکې د رالوېدو له امله پنځو تنو ژوند د لاسه ورکړی دی.
دغه الوتکه د یوه طبي ماموریت پرمهال رالوېدلې، چې د یوه کم عمره په ګډون اته کسان پکې سپاره وو.
د مکسیکو سمندري ځواکونو تایید کړې چې یوه الوتکه یې د امریکا د ټکزاس ایالت ګالوسټن ته نږدې وروسته له هغې رالوېدلې، چې طبي ماموریت یې ناکام شو.
د پنځو کسانو مړینه تایید شوې، په داسې حال کې چې دوه نور روغ دي او یو بل کس لا هم ورک دی.
د دوشنبې په ورځ د سمندري ځواکونو په وینا، دغه الوتکه – چې د کینګ ایر ANX-1209 ډوله وه – د طبي ماموریت پرمهال رالوېدلې، او د یوه کم عمره په ګډون اته کسان پکې سپاره وو.
الوتکې د "میچو وای ماو" بنسټ په ملاتړ څلور سمندري افسران او څلور ملکي وګړي لېږدول؛ دا بنسټ یوه غیر انتفاعي موسسه ده چې له سختو سوځېدلو ماشومانو سره مرسته کوي.
هغه کم عمره ناروغ چې د درملنې لپاره لېږدول کېده هم په وژل شویو کې شامل دی.
د ژغورنې عملیات د امریکا د ساحلي ګارد لخوا ترسره شول، چې الوتکه یې په سمندر کې پیدا کړه.
پر "X" (پخواني ټویټر) په یوه خپره شوې خبرپاڼه کې، د مکسیکو د بهرنیو چارو وزارت د دې پېښې پر مړینو خواشیني څرګنده کړې او ویلي یې دي چې په هوسټن کې یې د مکسیکو د قونسلګرۍ له لارې له سیمه ییزو چارواکو سره اړیکه نیولې ترڅو د قربانیانو له کورنیو سره مرسته وکړي.
د سیمه ییزو راپورونو له مخې، کله چې پېښه رامنځته شوه، الوتکې د ناستې لپاره چمتووالی نیوه. دا پېښه د ګڼې لړې په ترڅ کې شوې چې د ټکزاس ځینې برخې یې پوښلې وې.
