د بلوچستان په مرکز کې د پاکستان د ملیشه ځواکونو مرکز ته نږدې موټر بم چاودنې لږ تر لږه ۱۰ کسان وژلي او ۳۲ نور یې ټپیان کړي دي.
دا چاودنه د سې شنبې په ورځ په کوټې ښار کې د ملیشه ځواکونو مرکز ته نږدې د پښین سټاپ په ګڼه ګوڼه ډکه سیمه کې وشوه.
اوسېدونکو ویلي، چاودنه دومره ځواکمنه وه چې غږ یې تر مایلونو لرې اورېدل شوی دی.
امبولانسونه د پیښې ځای ته ورسیدل او ټپیان يي نږدې روغتونونو ته انتقال کړل.
امنیتي ځواکونو سیمه کلابنده کړې او د چاودنې د عاملینو د موندلو لپاره یې د پلټنې عملیات پیل کړي دي.
د چاودنې مسؤلیت سمدستي کومې ډلې پر غاړه نه دی اخیستی.
د بلوچستان اعلی وزیر میر سرفراز بګټي پر اېکس شبکه دا پېښه غندلې او یو "ترهګریز برید" یې بللی دی.
هغه وویل چې څلور ترهګر له منځه وړل شوي دي.
د پاکستان خبري وېبپاڼې ډان (Dawn) د بلوچستان د روغتیا وزیر بخت محمد کاکړ له قوله لیکلي: "په چاودنه کې لس کسان وژل شوي او دوه دېرش ټپیان دي. ټپیان ملکي روغتون او د ټراما مرکز ته لېږدول شوي دي."
دا له کانونو ډک ولایت له اوږدې مودې راهیسې د تاوتریخوالي مرکز دی، چېرې چې امنیتي ځواکونه د بلوڅو او پآکستاني طالبانو د بغاوت سره مخ دي.
