ولسمشر ټرمپ اوهایو ایالت ته، چېرته چې هغه یوه ټاکنیزه غونډه ترسره کوي، د تلو پر مهال له سپینې ماڼۍ څخه د وتلو په وخت کې خبریالانو ته څرګندونې وکړې.
ټرمپ د دې په بیانولو سره چې په امریکا کې د دوبي او ژمي د ساعتونو د بدلون لړۍ باید لغوه شي، غوښتنه وکړه چې په دې اړه جوړه شوې قانوني طرحه (لایحه) دې د سنا مجلس له خوا تصویب شي.
د امریکا ولسمشر د دې خبرې په کولو سره چې دا چاره د هېواد پر اقتصاد لوی پیټی دی او د خلکو د ژوند نظم ګډوډوي، وویل: "موږ غواړو په کال کې دوه ځله د ساعتونو د مخکې او شاته کولو له دې بې مانا او مسخره دود څخه ځان خلاص کړو."
ټرمپ د دې په روښانه کولو سره چې د ټولنې لویه برخه غواړي د ورځې له رڼا څخه ډېره ګټه پورته کړي خو د ژمني ساعت په پیلېدو سره هوا ډېر ژر تیاره کېږي، پر جمهوري غوښتونکي سناتور ټام کاټن سختې نیوکې وکړې چې په سنا کې یې د یادې لایحې د تصویب مخه نیولې ده.
ټرمپ د دې په یادولو سره چې دا لایحه مخکې د استازو مجلس له خوا تصویب شوې ده، وویل: "د استازو مجلس دا لایحه له ۸۰ سلنې څخه په زیاتو رایو سره تصویب کړه. دا لایحه له څه مودې راهیسې په سنا کې په تمه ده او زه هیله من یم چې وکولای شو ټام کاټن اقدام کولو ته اړ کړو. ټام کاټن د لایحې مخه نیسي، هغه باید دا کار ونه کړي."
ټرمپ، چې پرون یې پر خپلو ټولنیزو رسنیو د کاټن د ګرځنده تلیفون شمېره خپره کړې وه، له رایه ورکوونکو غوښتي وو چې پر کاټن فشار راوړي ترڅو د یادې لایحې مخنیوی ونه کړي.
په امریکا کې د دوبي د ساعتونو بدلون لړۍ، چې له لومړۍ نړیوالې جګړې راهیسې په بېلابېلو بڼو پلي کېده، په ۱۹۶۶ کال کې د یوه فدرالي قانون له تصویبېدو وروسته په رسمي توګه په ټول هېواد کې پلي کېږي.
