ملګروملتونو غزه په نړۍ کې تر ټولو د وږې سیمې په توګه اعلان کړه.
د ملګرو ملتونو د بشري مرستو د همغږۍ دفتر (OCHA) ویلي چې محاصرې لاندې غزه په نړۍ کې تر ټولو لوږې ځپلې سیمه ده، او غوښتنه یې کړې چې مرستې دې سمدستي پرېښودل شي.
د ملګرو ملتونو د بشري مرستو د همغږۍ دفتر ویاند جینس لارک وویل، د ملګرو ملتونو نیوز ته وویل: "اوس مهال، نږدې ۱۸۰,۰۰۰ د خوراکي توکو او نورو ژوند ژغورونکو مرستو بار شوي کانټینرونه غزې ته د ننوتو لپاره چمتو دي، چې د نړۍ تر ټولو لوږې ځپلې سیمه ده."
هغه زیاته کړه: "دغه مرستې د نړۍ د مرسته کوونکو لخوا مخکې له مخکې ورکړل شوې دي. ګمرکي اسناد یې بشپړ شوي، منظور شوي او د لیږد لپاره چمتو دي. موږ کولی شو دغه مرستې سمدستي او په پراخه کچه ورسوو، او تر هغه وخته چې اړتیا وي، دوام ورکړو."
لارک ټینګار وکړ چې دغه اداره "ټول هغه وسایل لري چې مرستې په خوندي ډول د غزې خلکو ته ورسوي."
له مارچ میاشتې راهیسې، اسرائیل د محاصره شوې غزې سیمې ته د خوراکي مرستو د ننوتلو مخه نیولې، چې فلسطینیان یې د لوږې سره مخ کړي دي.
د 'سیسټماټیکو دروغو کمپاین'
په ورته وخت کې، د غزې سیمه ییزو چارواکو د اسرائیلي مقاماتو ادعاوې رد کړي چې ګواکې حماس په ګودامونو کې اوړه ذخیره کړي دي، او دا یې د تل ابیب لخوا د "سیسټماټیکو دروغو کمپاین" یوه برخه وبلله، چې غواړي د جګړې د وسلې په توګه د لوږې کارولو نړیوال مسؤلیت څخه ځان خلاص کړي.
د اسرائیلي پوځ ویاند، اویخای ادرعي، په ایکس (پخوانی ټویټر) کې یوه ویډیو خپره کړه چې پکې د اسرائیلي لوږې د تګلارې له امله ځوریدلي فلسطینیان د ملګرو ملتونو په یوه ګودام کې ګڼه ګوڼه جوړوي.
په ځواب کې، د غزې د رسنیو دفتر وویل: "د اسرائیلو اشغالګر دروغ خپروي ترڅو د خپلو خلکو په وړاندې د لوږې د تګلارې پټولو هڅه وکړي، په داسې حال کې چې همدا دوی دي چې نړیوالو سازمانونو ته یې د فلسطیني کورنیو لپاره د مرستو د وېش مخه نیولې ده."
دغه دفتر وویل چې یاد ګودام د ملګرو ملتونو د نړیوال خوراکي پروګرام (WFP) پورې اړه لري؛ خو اسرائیلو په بیړه سره یوه جعلي کیسه جوړه کړه.
دفتر د نړیوالو سازمانونو حواله ورکړه چې اسرائیلي پوځ د WFP څخه د اوړو او خوراکي مرستو د وېش مخه نیولې وه، او پر ځای یې امر کړی و چې دغه مرستې یوازې نانوایانو ته ورکړل شي – هغه تګلاره چې اوس ورته "انجنیر شوې لوږه" ویل کیږي.
تر دې دمه، اسرائیلو په محاصره شوې غزه کې له ۵۴,۰۰۰ څخه زیات فلسطینیان وژلي دي، چې ډېری یې ښځې او ماشومان دي.
