د امریکا ولسمشر ډونالډ ټرمپ ویلي، امریکايي پوځ د ایران پر خارک ټاپو یو لوی برید کړی او خبرداری یې ورکړی چې که د هرمز تنګي له لارې د کښتیو تګ راتګ ګډوډ شي، نو د دغه هېواد د تېلو بنسټیز تاسیسات به په نښه شي.
ټرمپ د شنبې په سهار پر خواله رسنیو ولیکل: "د امریکا مرکزي قومندانۍ (سنټکام) د منځني ختیځ په تاریخ کې یو له تر ټولو ځواکمنو بمي بریدونو څخه ترسره کړ او د ایران په ارزښتناک ټاپو، خارک کې یې هر پوځي هدف په بشپړه توګه له منځه یووړ."
"ما غوره وګڼله چې پر دغه ټاپو د تېلو بنسټیز تاسیسات له منځه یونه سم. خو که ایران یا بل هر څوک د هرمز تنګي له لارې د کښتیو په ازاد او خوندي تګ راتګ کې خنډ جوړ کړي، زه به سمدستي پر خپلې پرېکړې بیا کتنه وکړم."
بنسټیز ټاپو
که څه هم امریکا او اسرائیلو د دغه ټاپو په اړه له احتیاط څخه کار اخیستی، خو د ټرمپ ادارې د چارواکو له قوله ویل شوي چې په منځني ختیځ کې د امریکا او اسرائیلو د جګړې د دوام په صورت کې د خارک نیول یو له انتخابونو څخه دی.
د جي پي مورګن د یوه نوي راپور له مخې، دغه ټاپو چې د ایران له اصلي خاورې شاوخوا ۳۰ کیلومتره لرې موقعیت لري، د ایران د اومه تېلو شاوخوا ۹۰ سلنه صادرات له همدې لارې کېږي.
دغه ټاپو د منهاتن شاوخوا درېیمه برخه مساحت لري او کارپوهان وايي چې د دې پر وړاندې هر ډول اقدام به چټک غبرګونونه ولري.
د ایران بریدونو د هرمز په تنګي کې سمندري تګ راتګ تقریبا په ټپه درولی - هغه تنګی چې په عادي توګه د نړۍ د اومه تېلو او مایع طبیعي ګاز پنځمه برخه له همدې لارې تېرېږي - او د خلیج په نورو هېوادونو کې یې هم د تېلو پر بنسټیزو تاسیساتو اغېز کړی دی.
ټرمپ وویل، امریکايي سمندري ځواک به "ډېر ژر" د تېلو د صادراتو د بیا پیلولو لپاره له دغه تنګي څخه د ټانکرونو ملتیا پیل کړي، ځکه نوموړی په امریکا کې د تېلو د لوړېدونکو بیو د کنټرولولو هڅه کوي.
په خارک ټاپو کې د ۱۹۶۰ او ۱۹۷۰ لسیزو پر مهال د ایران د تېلو صنعت د پراختیا په ترڅ کې مهم پرمختګونه وشول، ځکه په هغه وخت کې د دغه هېواد ډېری سواحل د لویو ټانکرونو لپاره ډېر کم عمقه وو.
