چین امریکا ته خبرداری ورکړ چې د نوو تعرفو سره سوداګریزه جګړه بیا پیل نکړي.
چین د سه شنبې په ورځ د ټرمپ ادارې ته خبرداری ورکړ چې د راتلونکي میاشتې لپاره د خپلو توکو پر ګمرکي تعرفو د بیاځلي لوړولو له لارې د سوداګرۍ کړکېچ بیا پیل نه کړي، او ګواښ یې وکړ چې د هغو هېوادونو پر وړاندې به غبرګون وښيي چې د چین د اکمالاتي ځنځیرونو څخه د ایستلو لپاره له امریکا سره تړونونه کوي.
د امریکا ولسمشر ډونالډ ټرمپ د دوشنبې په ورځ، خپلو سوداګریزو شریکانو ته خبر ورکړ چې د اګست له لومړۍ نېټې څخه به د متحده ایالاتو ګمرکي تعرفې په چټکۍ سره لوړې شي، وروسته له هغه چې هغه د اپرېل میاشتې تعرفې، پرته له لس سلنې څخه، د ډېرو هېوادونو لپاره وځنډولې ترڅو دوی ته د نړۍ له ستر اقتصاد سره د تړونونو کولو وخت ورکړي.
چین، چې په لومړي سر کې د ۱۰۰ سلنې څخه زیاتو تعرفو سره مخ شوی و، د اګست تر ۱۲ پورې وخت لري چې له سپینې ماڼۍ سره یو تړون ته ورسېږي ترڅو ټرمپ د اپرېل او مې په میاشت کې د تعرفو د تبادلې پر مهال لګول شوي اضافي محدودیتونه بیا عملي نکړي.
د خلکو ورځپاڼې په یوه تبصره کې وویل: "یوه خبره په څرګنده توګه روښانه ده: خبرې اترې او همکاري یوازینۍ سمه لار ده." دا تبصره د اوسني چین-امریکا سوداګریزو کړکېچونو په اړه شوې وه.
دغه مقاله د "ژونګ شینګ" په نوم لاسلیک شوې وه، چې معنی یې "د چین غږ" دی، او ورځپاڼه دا اصطلاح د بهرنیو چارو په اړه د خپل نظر څرګندولو لپاره کاروي.
بیجینګ د ټرمپ تعرفې "زورواکۍ" وبللې او زیاته یې کړه: "عمل ښودلې چې یوازې د اصولو په کلکه ساتلو سره یو څوک کولی شي خپل مشروع حقونه او ګټې په ریښتیني ډول خوندي کړي. د چین د واکمن کمونیسټ ګوند رسمي ورځپاڼې د ټرمپ " وروستي ضرب الاجل" ته په اشارې سره ویلي دي چې دغه څرګندونې د تعرفو د بلې جګړې لپاره زمینه برابروي که ټرمپ د هغه څه سره سم عمل وکړي.
د پیټرسن نړیوال اقتصاد انسټیټیوټ په وینا، د چین پر صادراتو د امریکا اوسط ګمرکي تعرفه اوس ۵۱.۱ سلنه ده، په داسې حال کې چې د امریکا پر توکو د چین اوسط تعرفه ۳۲.۶ سلنه ده، او دواړه خواوو ټول تجارت پوښي.
ورځپاڼې همدارنګه د هغو سیمه ییزو اقتصادونو په اړه نیوکه وکړه چې له متحده ایالاتو سره د تعرفو د کمولو تړونونه کوي چې چین د خپلو اکمالاتي ځنځیرونو څخه وباسي.
تېره اوونۍ، ویتنام د تعرفې د کمولو تړون ترلاسه کړ چې د ۴۶ سلنې څخه ۲۰ سلنې ته راښکته شوه، په داسې حال کې چې هغه توکي چې له چین څخه "انتقال" شوي وي، د ۴۰ سلنې تعرفې تابع دي.
ورځپاڼې وویل: "چین په کلکه د هر هغه اړخ مخالفت کوي چې د تعرفې د امتیازاتو په بدل کې د چین ګټې قرباني کوي." او زیاته یې کړه: "که داسې وضعیت رامنځته شي، چین به یې ونه مني او د خپلو مشروع ګټو د ساتنې لپاره به په کلکه ځواب ووايي."
