کرملین ویلي چې د روسیې ولسمشر ولادیمیر پوتین د اوکراین له ولسمشر ولادیمیر زیلینسکي سره لیدنې ته چمتو دی، خو په دې شرط چې دا لیدنه د سولې د تړونونو د لاسلیک کولو لپاره وي.
ویاند ډیمیتري پیسکوف د چهارشنبې په ورځ له ویسټي تلوېزیون سره په خبرو کې وویل، پوتین په وار وار له زیلینسکي سره لیدنې ته خپل چمتووالی ښودلی دی.
پیسکوف وویل: "اصلي خبره د لیدنې موخه ده. هغوی ولې باید سره وګوري؟ پوتین ویلي چې هغه په هر وخت کې په مسکو کې لیدنې ته چمتو دی." هغه زیاته کړه: "اصلي خبره دا ده چې لیدنه باید یوه موخه ولري، او تر ټولو مهمه دا چې لیدنه باید ګټوره وي، او دا یوازې د تړونونو د وروستي کولو په نیت کېدای شي."
نوموړي زیاته کړه چې د داسې یوې لیدنې وړاندې باید "جدي کار" وشي، او ادعا یې وکړه چې اوکراین په دې برخه کې "سیاسي اراده" نه لري.
زیلینسکي د چهارشنبې په ورځ وختي خبریالانو ته وویل چې اوکراین په "هر وخت" کې د خبرو اترو هر ډول چوکاټ ته چمتو دی، خو د مذاکراتو بیا پیل کېدل "زموږ پورې اړه نه لري."
هغه وویل، په اصولو کې د مذاکراتو د ترسره کولو لپاره لومړیتوب لرونکي هېوادونه هغه ځایونه دي چې مخکې هم پکې لیدنې شوې دي، او په ځانګړې توګه یې د ترکیې او منځني ختیځ نومونه یاد کړل.
د تورکیې د ولسمشرۍ دفتر ویلي، ولسمشر رجب طیب اردوغان د ناټو له عمومي منشي مارک روټې سره په کتنه کې ویلي چې انقره هڅه کوي د روسیې او اوکراین ترمنځ مذاکرات بیا راژوندي کړي او د جګړې د دواړو لورو مشران سره راټول کړي.
زیلینسکي زیاته کړه: "که څه هم په اصولو کې موږ په هر وخت او هر هېواد کې لیدنې ته نه وېرېږو، پرته له روسیې او بیلاروس څخه، موږ یو ځل بیا پر دې ټینګار کوو. زه ډاډه یم چې درې اړخیزه ناسته باید بیا پیل شي."
د امریکا په منځګړیتوب د روسیې او اوکراین ترمنځ د سولې خبرې څو ځله وشوې، خو د ایران جګړې دا بهیر له خنډ سره مخ کړی دی.
