د کاناډا  اسلامي ډله وايي، دا برید "هغه خطر په روښانه توګه رایادوي چې مخ پر زیاتېدونکې اسلاموفوبیا یې هره ورځ زموږ ټولنو ته مخامخ کړی دی.

د کاناډایي مسلمانانو ملي شورا په یوه اعلامیه کې ویلي چې په ویکټوریا ښار کې د BCMA جومات پر امام له جومات بهر برید شوی دی.

د شنبې د ورځې د اعلامیې له مخې، شیخ ابراهیم د پنجشنبې په ماښام له لمانځه وروسته په خپل موټر کې ناست و چې یو کس یې د موټر دروازه په زوره پرانیسته، برید یې پرې وکړ او د اسلاموفوبۍ سپکې سپورې یې ورته وویلې، په شمول د دې چې "خپل هېواد ته دې لاړ شه."

اعلامیې زیاته کړې چې دغې ادارې په تېرو ۴۸ ساعتونو کې له چارواکو سره تماسونه نیولي، ترڅو له پېښې وروسته خوندیتوب او حساب ورکونه ډاډمنه کړي.

په اعلامیه کې راغلي: "په دې ډول د یوه محترم دیني مشر په نښه کول او پر هغه برید کول په هېڅ صورت د منلو وړ نه دي. دا همدارنګه هغه خطر په روښانه توګه رایادوي چې مخ پر زیاتېدونکې اسلاموفوبیا یې هره ورځ زموږ ټولنو ته مخامخ کړی دی."

اعلامیې ویلي: "موږ نشو کولی چوپ پاتې شو په داسې حال کې چې دا ډول پېښې په  ټکان ورکوونکي ډول تکرارېږي." اعلامیې په ټولو کچو پر مشرانو غږ کړی چې د مسلمانانو ضد تاوتریخوالی وغندي او د مخ پر زیاتېدونکې کرکې د مخنیوي لپاره کوټلي ګامونه پورته کړي.

دغې ډلې پر قانون پلي کوونکو بنسټونو غږ کړی چې د دغه برید ټول اړخونه وڅېړي، په ځانګړي ډول دا چې ایا دغه برید د کرکې پر بنسټ و که نه، او ډاډمنه کړي چې مسؤل کس قانون منګولو ته راښکدل شوی دی.

د امام د روغتیايي وضعیت او یا پر بریدګر د احتمالي تورونو په اړه نور جزئیات نه دي ورکړل شوي.