په داسې حال کې چې روسیه د ډله ییزو ډرون الوتکو د شنډولو راپور ورکوي او د اوکراین بریدونو په کریمیا کې برښنا پرې کړې، د جګړې په کرښو کې بریدونه شدید شوي دي.
د روسیې د دفاع وزارت وویل چې د دوی هوايي دفاعي سیسټمونو تېره شپه د اوکراین ۳۲۳ بې پیلوټه الوتکې (ډرون) نسکورې کړې دي. روسي خبري اژانسونو د چهارشنبې په ورځ راپور ورکړ چې دواړو لورو خپلو بریدونو ته زور ورکړی دی.
د روسیې د "اورینبورګ" سیمې والي وویل چې په دغه سیمه کې د یوه صنعتي تاسیساتو په نښه کونکي ډرون الوتکې نسکورې شوې دي، خو هغه د اوښتو زیانونو یا مرګ ژوبلې په اړه نور جزیات نه دي ورکړي.
دا برید د روسیې د خاورې په ژورو برخو کې د اوکراین د هغو بریدونو لړۍ ده چې کیف وايي هدف یې هغه تاسیسات دي چې د مسکو د جګړې مالي سرچینې برابروي، لکه د تېلو زېرمې او تصفیه خانې.
د روسیې له خوا د ضمیمه شوې کریمیه په ترټولو لوی ښار "سیواستوپول" کې وروسته له هغه برښنا پرې شوه چې اوکراین هلته د انرژۍ تاسیسات په نښه کړل. دا خبره د روسیې له خوا ګومارل شوي والي میخایل رزوزاییف په ټیلیګرام کې کړې ده. هغه وویل چې د چهارشنبې په ورځ وختي د ښار دپاسه نهه ډرون الوتکې شنډې شوې وې.
رزوزاییف پر اوسیدونکو غږ وکړ چې د خپلو کمزورو ګاونډیانو حال واخلي او د تلیفونونو کارول یوازې بېړنیو اړیکو ته محدود کړي. هغه کیف تورن کړ چې د لومړنیو خدماتو په پرې کولو سره غواړي د خلکو ترمنځ "ویره او وحشت" خپور کړي.
کریمیه چې په ۲۰۱۴ کال کې د روسیې له خوا له خپلې خاورې سره یوځای شوې، په منظم ډول د اوکراین د توغندیو او ډرون بریدونو هدف ګرځي، ځکه چې دا سیمه د روسي ځواکونو لپاره خورا مهم لوژستیکي ارزښت لري.
په خارکیف کې خونړی برید
د اوکراین د خارکیف سیمې نظامي مشر اولیګ سینګوبوف په ټیلیګرام کې لیکلي چې په "بالاکلیا" ښارګوټي باندې د شپې لخوا په یو ډرون برید کې یوه ۵۶ کلنه ښځه وژل شوې ده. هغه زیاته کړه چې په دې برید کې یوه ۲۱ کلنه نجلۍ د سختې رواني صدمې (فشار) ښکار شوې، اور لګیدلی او کورونو ته زیان رسیدلی دی.
رویټرز خبري اژانس نه شي کولی په خپلواک ډول د دواړو خواو د وروستیو بریدونو جزیات تایید کړي.
د بریدونو دا تبادله په داسې حال کې زیاته شوې چې د امریکا په منځګړیتوب له دویمې نړیوالې جګړې وروسته د اروپا د دې ترټولو خونړۍ جګړې د پای ته رسولو خبرو اترو کې د پرمختګ کومه نښه نه لیدل کیږي.
روسیې د خپل پنځه کلن یرغل په اوږدو کې نږدې هره ورځ اوکراین په توغندیو او ډرون بریدونو ویشتلی، پداسې حال کې چې اوکراین هم د روسیې د انرژۍ د زیربناوو په وړاندې د خپلو لیرې واټن ویشتونکو بریدونو لړۍ پراخه کړې ده.
