چارواکو د جمعې په ورځ وویل، د روسیې لخوا پر اوکراین د شپې له خوا په بریدونو کې له ۳۰ څخه زیات کسان ټپیان کړل، دا بریدونه یوه ورځ وروسته له هغه چې کیف او واشنګټن د معدني موادو په اړه یو تاریخي تړون لاسلیک کړ ترسره شوي دي.
اوکراین هیله لري چې دغه تړون به لاره هواره کړي تر څو واشنګټن د دې جګړه ځپلي هېواد لپاره امنیتي ژمنې ورکړي، کوم چې له درې کلونو څخه زیات د روسیې د یرغل پر وړاندې مبارزه کوي.
د زاپورېژیا د صنعتي ښار سیمه ییز والي، ایوان فیدوروف، په ټیلیګرام کې لیکلي: "د دښمن د شپې د برید په پایله کې ۲۹ کسان ټپیان شوي دي." هغه زیاته کړه چې د بې پیلوټه الوتکې په برید کې یو ۱۳ کلن هلک هم د قربانیانو په منځ کې دی.
فیدوروف لیکلي: "روسانو د ښار ملکي زیربناوې په نښه کړي دي. د استوګنې ودانۍ، یو پوهنتون، او یوه زیربنایي ودانۍ زیانمنه شوې دي."
په ختیځ دنیپروپیټروفسک سیمه کې هم دوه کسان د روسیې د بې پیلوټه الوتکې په برید کې ټپیان شوي دي، چې په دوو ځایونو کې اورونه بل شوي دي، د سیمې والي سرګي لیساک په ټیلیګرام کې وویل.
د اوکراین ملي ریل پټلۍ شرکت وویل چې د زاپورېژیا د لوکوموټیو ترمیم فابریکه د شپې د یو لوی برید هدف ګرځېدلې وه، چې په پایله کې یې اور ولګېد او څو ساعته یې دوام وکړ. په دې پېښه کې د ټپیانو راپور نه دی ورکړل شوی.
د روسیې د دفاع وزارت ویلي چې د دوی هوايي دفاعي سیستمونو د شپې له خوا ۱۲۱ اوکرایني بې پیلوټه الوتکې ویجاړې کړې، چې ډېری یې د کریمیا په سیمه کې وې، هغه ټاپووزمه چې روسیې په ۲۰۱۴ کال کې ضمیمه کړه.
دا وروستی برید وروسته له هغې وشو چې د اوکراین ولسمشر ولادیمیر زیلینسکي وویل چې د امریکا سره د معدني موادو تړون دواړو خواوو ته " برابري" ګټې وړاندې کوي، که څه هم دغه تړون کیف ته کوم مشخص امنیتي تضمين نه دې ورکړې.
د اوکراین مشر له خپلو متحدینو وغوښتل چې په روسیه فشار زیات کړي ترڅو دا هېواد خاموشه شي او خبرو اترو ته حاضر شي.
