ټرمپ وايي که له روسیې سره جګړه حل نه شي، اوکراین ته به ټام هاک توغندي ولېږي
د امریکا ولسمشر اسرائیلو او مصر ته تر روانېدو مخکې، چېرته چې د غزې پر اوربند د شرم الشیخ سرمشریزه جوړېږي، ویلي چې اوکراین "غواړي ټام هاک توغندي ولري."

د امریکا ولسمشر ډونالډ ټرمپ ویلي، که له روسیې سره د اوکراین جګړه هواره نه شي، نو اوکراین ته به ټام هاک کروز توغندي ولېږي.

ټرمپ د یکشنبې په ورځ اسرائیلو او مصر ته تر روانېدو مخکې، چېرته چې د غزې پر اوربند د شرم الشیخ سرمشریزه جوړېږي، وویل چې اوکراین "غواړي ټام هاک توغندي ولري."

هغه د اوکراین له ولسمشر ولادیمیر زیلینسکي سره خپلو خبرو ته په اشارې وویل، "موږ په دې اړه خبرې کړې دي، نو وبه ګورو."

هغه وویل چې ولسمشر زیلینسکي ته یې ویلي: "رښتیا ووایم، شاید زه له روسیې سره خبرې وکړم. ایا هغوی غواړي چې ټام هاک توغندي هغه لوري ته ولاړ شي؟ زه داسې فکر نه کوم. زه فکر کوم چې د انصاف له مخې، زه باید په دې اړه له روسیې سره خبرې وکړم." ټرمپ دغه راز ټام هاک توغندي "د تېري یو نوی ګام" وبلل.

"وګورئ، که دا جګړه هواره نه شي، زه به هغوی ته ټام هاک توغندي ولېږم. زه ویلای شم چې ټام هاک یوه باوري وسله ده، یوه ډېره بریدګره وسله ده. او رښتیا ووایم، روسیه دې ته اړتیا نه لري... زه شاید هغوی ته ووایم چې که جګړه هواره نه شي، نو موږ ممکن دا کار وکړو. ممکن ویې نه کړو، خو ممکن ویې کړو."

هغه زیاته کړه: "زه غواړم چې جګړه پای ته ورسېږي."

د هغه دا څرګندونې وروسته له هغه وشوې، چې زلنسکي د یکشنبې په ورځ وویل چې د ټرمپ د غزې د اوربند پلان دا "هیله" ورکوي چې ورته کړنلاره کولی شي د روسیې او اوکراین جګړه پای ته ورسوي.

زلنسکي دا هم وویل، چې دواړه هېوادونه پر دې کار کوي چې امریکا کییف ته اوږدمهاله ټام هاک کروز توغندي ولېږي.

تېره دوشنبه، ټرمپ ویلي وو چې دی دې پرېکړې ته نږدې دی چې ایا کییف ته ټام هاک توغندي ولېږي او که نه، او زیاته یې کړه چې غواړي "معلومه کړي چې هغوی په دغو توغندیو څه کوي او چېرته یې استوي."