د بریدګر د برخلیک په اړه تر اوسه معلومات نشته.
د امریکا د واشنګټن ایالت په سیاتل ښار کې د خوړو په یوه مېله (فیسټیوال) کې د وسله وال برید له امله ۲ کسانو خپل ژوند له لاسه ورکړی او ۵ نور ټپیان شوي دي.
د سیاتل د اور وژنې ادارې ویاندې "ګریس نونیز" اعلان وکړ چې وسله وال برید د سیاتل د مشهور کتنځای "سپیس نیډل"ته نږدې د "بایټ آف سیاتل" په نوم د خوړو په مېله کې د ځايي وخت په مازیګر شاوخوا ۶:۰۰ بجې وشو.
نوموړې وویل چې ۲ کسان په پېښه ځای کې وژل شوي او د یوه نازک حالت لرونکي په ګډون ۵ نور ټپیان د "هاربورویو روغتیايي مرکز ته لېږدول شوي دي.
له خبر ترلاسه کولو وروسته سیمې ته په زیات شمېر کې پولیس او د لومړنیو مرستو ډلې ورسېدې او د مېلې شاوخوا سیمه له خلکو خالي کړل شوه. تر اوسه دا نه ده معلومه چې شکمن بریدګر نیول شوی او که نه.
د واشنګټن ایالت والي "باب فرګوسن" خبر ورکړ چې د ایالتي ګزمې د ځانګړو عملیاتو ټیمونه له سیمه ییزو پولیسو سره د مرستې لپاره سیمې ته استول شوي دي. فرګوسن وویل: "زما دعاګانې د قربانیانو له کورنیو او هغو منسوبینو سره دي چې د خلکو د امنیت خوندي کولو لپاره هڅې کوي."
د یادونې وړ ده چې دغه دودیزه درې ورځنۍ مېله لومړی ځل په ۱۹۸۲ کال کې پیل شوې او هر کال نږدې ۳۵۰ زره کسان پکې ګډون کوي.
