د پاکستان په شمال لوېدیځ کې د پولیسو پر روزنیز مرکز ځانمرګی برید شوی
چارواکي وايي، بریدګرو د خیبر پښتونخوا ایالت په ډېره اسماعیل خان ولسوالۍ کې یو له چاودېدونکو توکو ډک موټر له دغه مرکز سره جنګولی دی.
د ډېره اسماعیل خان ښار یوه اوسېدونکي وویل چې درنې ډزې روانې دي او د څو چاودنو غږونه اورېدل شوي دي
چارواکو انادولو اژانس ته ویلي چې د جمعې په ورځ د پاکستان په شمال لوېدیځ کې د پولیسو پر یوه روزنیز مرکز ځانمرګی برید شوی دی.
د ملکي او پولیسو ادارې سرچینو ویلي، چې د خیبر پښتونخوا ایالت په ډېره اسماعیل خان ولسوالۍ کې وسله وال له پولیسو سره د ډزو له تبادلې وروسته مرکز ته ننوتلي دي.
یوه پولیس چارواکي انادولو اژانس ته د ټیلیفون له لارې وویل: "ترهګرو د پولیسو پر روزنیز مرکز برید وکړ، او یو شمېر یې مرکز ته په ننوتلو بریالي شول. خو پولیسو ورسره نښته پیل کړې او د ډزو تبادله لا هم روانه ده. تر اوسه د مرګ ژوبلې په اړه کره معلومات نشته."
یوه بل چارواکي انادولو ته وویل: "دا یو ځانمرګی برید و. بریدګرو یو له چاودېدونکو توکو ډک موټر له اصلي دروازې سره وجنګاوه او مرکز ته په ننوتلو بریالي شول."
دغه چارواکي د نوم نه ښودلو په شرط وویل: "موږ سیمې ته اضافي پولیس استولي او د پوځ سرتېري هم را رسېدلي دي. درنې ډزې روانې دي، خو د تیارې له امله د سیمې دقیق وضعیت لا هم روښانه نه دی."
د ډېره اسماعیل خان ښار یوه اوسېدونکي وویل چې درنې ډزې روانې دي او د څو چاودنو غږونه اورېدل شوي دي.
د وضعیت د کنټرول لپاره، د بمونو د خنثی کولو ډلې په ګډون د پولیسو یوه لویه قطعه روزنیز مرکز ته استول شوې ده.
