د روسیې د سمندري ځواکونو مرستیال قوماندان په کورسک سیمه کې ژوند د لاسه ورکړ.

د روسیې د دفاع وزارت تایید کړې چې د روسیې د سمندري ځواکونو مرستیال مشر، جنرال میخائیل ګودکوف، د روسیې د کورسک په سرحدي سیمه کې وژل شوی دی.

د پریموریه والي اولیګ کوژیمیاکو وویل چې د  روسیې د سمندري ځواکونو مرستیال قوماندان، میخائیل ګودکوف، د کورسک او پریموریه سیمو کې د پنجشنبې په ورځ وژل شوی دی.

هغه د پنجشنبې په ورځ په کورسک سیمه کې وژل شویو کسانو کورنیو، دوستانو او ملګرو سرتیرو ته خپله خواخوږي څرګنده کړه .

د کوژیمیاکو په وینا، ګودکوف د یوه افسر په توګه د خپلې دندې د ترسره کولو پر مهال له خپلو ملګرو سرتیرو سره وژل شوی دی.

هغه زیاته کړه: "د هغه وفادار ملګری او زموږ ګډ دوست، نریمان شیکالییف، هم د قوماندان ترڅنګ وژل شوی دی."

غیر رسمي روسي او اوکرایني پوځي ټیلیګرام چینلونو مخکې راپور ورکړی و چې ګودکوف د کورسک په کورینیوو سیمه کې د یوه قوماندې مرکز باندې د اوکراین په برید کې له لسو نورو سرتیرو سره وژل شوی دی.

هغه د اوکراین لخوا د وژل شویو لوړ پوړو روسي پوځي افسرانو څخه یو دی.

ګودکوف د اوکراین پر وړاندې په پوځي عملیاتو کې د زړورتیا  جایزې ترلاسه کړې وې او کیف هغه د " جنګي جرمونو" په ترسره کولو تورن کړی و.

د کریملین په ویب پاڼه کې د یوې اعلامیې له مخې د روسیې ولسمشر ولادیمیر پوتین هغه د روان کال په مارچ میاشت کې د سمندري ځواکونو مرستیال قوماندان وټاکه.

د کورسک ځینې برخې د ۲۰۲۴ کال په اګست کې د اوکراین ځواکونو لخوا د ناڅاپي برید په ترڅ کې ونیول شوې وې، خو روسیې وویل چې سږ کال یې دغه سیمې بېرته نیولې دي.