د پاکستان پوځ په تیرو دوو ورځو کې د په لسګونو ترهګرو د وژلو نه خبر ورکړ.
د پاکستان پوځ د دوشنبې په ورځ وویل، چې په تېرو دوو ورځو کې د دغه هېواد په شمال لوېدیځ کې په دوو جلا امنیتي عملیاتو کې لږ تر لږه ۳۱ ترهګر وژل شوي دي.
د پوځ په یوه خبرپاڼه کې ویل شوي، چې دغه ترهګر د سپتمبر په ۱۳مه او ۱۴مه نېټه د شمال لوېدیځ خیبر پښتونخوا ایالت په بېلابېلو برخو کې وژل شوي دي.
شاوخوا ۱۴ ترهګر په لکي مروت ولسوالۍ کې او ۱۷ نور په څېرمه بنو ولسوالۍ کې وژل شوي دي.
دا وروستي عملیات څو ورځې وروسته له هغه ترسره شول، چې تېره اوونۍ په دغه ایالت کې په جلا جلا نښتو کې د پوځ ۱۲ سرتېري او ۳۵ ترهګر وژل شوي وو.
پاکستاني امنیتي ځواکونه له تېرو څو کلونو راهیسې د ترهګریزو بریدونو له یوې لړۍ سره مخ دي، چې اسلام اباد یې پړه پر "افغانستان مېشتو" هغو ترهګرو اچوي چې له تحریک طالبان پاکستان سره تړاو لري. تحریک طالبان پاکستان په دغه هېواد کې د څو ناقانونه ډلو یوه ټولګه ده.
