محمد باقر قالیباف وایي چې تهران پر واشنګټن باور نه لري او د دواړو خواوو ترمنځ د ډزو له نوي تبادلې وروسته به د خپلو ګټو دفاع ته دوام ورکړي.

د ایران جګپوړي مذاکره کوونکي محمد باقر قالیباف ویلي چې له متحده ایالاتو سره په روانه شخړه کې به ایران هیڅکله تسلیمۍ ته غاړه کینږدي . دا څرګندونې وروسته له هغه کېږي چې په روانه اونۍ کې د دواړو پخوانیو دښمنانو ترمنځ یو ځل بیا متقابل بریدونه پیل شول.

د ایسنا (ISNA) خبري اژانس د راپور له مخې، قالیباف چې د ایران د پارلمان رئیس هم دی، د جمعې په ورځ وویل: "د جګړې پای ته رسول د نړۍ د هېوادونو لومړیتوب دی، خو هر څوک باید پوه شي چې دا مقابله به هېڅکله د ایران په تسلیمۍ پای ته ونه رسېږي."

نوموړي د اندونیزیا د ولسي مشورتي جرګې له رئیس سره په لیدنه کې زیاته کړه: "کله چې امریکایان له شوي تفاهم (هوکړې) څخه سرغړونه کوي، موږ خپلې دفاع ته بشپړ چمتو یو. موږ به د هغوی پر وړاندې په کلکه ولاړ وو او د ایراني ملت حقونه به خوندي کړو."

امریکا او ایران په روانه اونۍ کې څو ځله پر یو بل بریدونه کړي دي. واشنګټن پر تهران تور پورې کړی چې سوداګریزې کښتۍ یې په نښه کړې دي او بیا یې غچ اخیستونکي بریدونه کړي. ایران په ځواب کې ویلي چې په منځني ختیځ کې یې د امریکا تاسیسات په بې پیلوټه الوتکو او توغندیو ویشتلي دي.

دا نوی تاوتریخوالی یوازې درې اونۍ وروسته له هغه رامنځته کېږي چې واشنګټن او تهران یو تړون لاسلیک کړ چې هدف یې د څو میاشتني اوربند په دایمي سوله بدلول و. خو د پنجشنبې په ورځ د دویمې پرله پسې ورځې لپاره د متقابلو بریدونو په سیمه کې د یوې پراخې جګړې د پیلیدو وېره زیاته کړې ده.

قالیباف وویل چې د مذاکراتو پر مهال یې د امریکا د ولسمشر مرستیال جې ډي وینس (JD Vance) ته ویلي و: "موږ پر تاسو هېڅ باور نه لرو." هغه زیاته کړه: "زما په نظر، له امریکا سره یوازې هغه کسان خبرې کولی شي چې جګړې ته چمتو وي."

بلخوا، د امریکا ولسمشر ډونالډ ټرمپ د جمعې په ورځ وویل چې له ایران سره یې پر نورو خبرو اترو موافقه کړې، که څه هم هغه خپله دا ادعا تکرار کړه چې د دواړو هېوادونو ترمنځ اوربند پای ته رسېدلی دی.

سیمه ییزو رسنیو راپور ورکړی چې د وروستي تاوتریخوالي له امله، د جمعې په ورځ د منځګړي قطر یو پلاوی د خبرو اترو لپاره ایران ته رسېدلی دی.