په غزه کې د اسرائیلو ملاتړې ملیشې مشر ووژل شو
د اسرائیلي رسنیو په وینا، یاسر ابو شباب په قومي شخړو کې وژل شوی دی.

د اسرائیلي رسنیو د راپورونو له مخې، د پنجشنبې په ورځ  په غزه کې د اسرائیلو په ملاتړ د یوې ملیشې مشر وژل شوی دی.

د KAN په نوم دولتي ټلوېزیون د نامعلومو امنیتي سرچینو په حواله ویلي چې یاسر ابو شباب، چې د اسرائیلو له پوځ سره یې په همکارۍ کار کاوه، په غزه کې په قومي شخړو کې وژل شوی دی.

د اسرائیلو i24 ټلوېزیوني چینل ویلي چې ابو شباب د اسرائیلو په جنوب کې په سوروکا طبي مرکز کې د ټپونو له امله مړ شوی.

د ۱۲ چینل لپاره اسرائیلي سیاسي شنونکي، امیت سیګل، د دغه ملیشه مشر مړینه "د اسرائیلو لپاره یو بد پرمختګ" بللی، ځکه "حماس هغه د خپلې واکمنۍ لپاره یو ستراتیژیک ګواښ ګڼه."
تېر جولای کې، حماس د غزې د دې ډلې مشر ته امر کړی و چې په ۱۰ ورځو کې تسلیم شي، او پر هغه یې له اسرائیلو سره د همکارۍ او د بشري مرستو د لوټلو تور پورې کړی و.

تر دې مخکې، لومړي وزیر بنیامین نتنیاهو وروسته له هغه چې یوه پخواني وزیر ویلي وو اسرائیلو هغوی ته وسلې ورکړې دي، منلې وه چې اسرائیل په غزه کې له یوې داسې وسله والې ډلې ملاتړ کوي چې د فلسطیني مقاومتي ډلې حماس سره مخالفت لري.

اسرائیلي او فلسطیني رسنیو راپور ورکړی چې هغه ډله چې اسرائیل ورسره کار کوي د یاسر ابو شباب په مشرۍ د یوې ځايي بدوي قبیلې برخه ده.

د بهرنیو اړیکو اروپایي شورا (EFCR) په نوم فکري مرکز ابو شباب "د رفح په سیمه کې د یوې فعالې جنایتکارې ډلې" د مشر په توګه یادوي چې "په پراخه کچه د مرستندویه لارۍ موټرو په لوټلو تورنه ده."

د کنیسټ غړي او پخواني دفاع وزیر اویګدور لیبرمن د کان عامه ټلوېزیون ته ویلي و چې حکومت د نتنیاهو په لارښوونه "د جنایتکارانو او مجرمینو یوې ډلې ته وسلې ورکوي."