سپاه پاسداران وايي چې د تهران په شاوخوا سیمو کې د امریکايي بریدونو په غبرګون کې یې ۱۲ بالستیک توغندیو سره د الازرق هوايي اډه ویشتلي، چې امریکايي جنګي الوتکې پکې ځای پر ځای دي؛ دا ادعاوې لا تر اوسه په خپلواکه توګه نه دي تایید شوې.

د ایران د سپاه پاسداران انقلاب اسلامي ځواکونو د پنجشنبې په ورځ وویل چې په اردن کې یې یوه داسې اډه په نښه کړې چې د امریکا F-35، F-15 او F-16 جنګي الوتکې پکې مېشتې وې. دا برید پر ایران باندې د امریکا د بریدونو په ځواب کې شوی دی.

په یوه اعلامیه کې، سپاه پاسداران ویلي چې د دوی د هوايي فضا ځواک ۱۲ بالستیک توغندي پر الازرق هوايي اډې او د امریکايي پوځ پر نورو مهمو تاسیساتو توغولي دي.

په اعلامیه کې ادعا شوې چې په دغه برید کې د اډې تاسیسات او همدارنګه هلته مېشتې ګڼ شمېر امریکايي جنګي الوتکې ویجاړې شوې دي.

سپاه پاسداران وویل چې دا بریدونه د تهران په لوېدیځ کې په کرج او نظر اباد سیمو کې د یوې تفریحي سیمې، یو صنعتي کمپلیکس او دغه راز په پیشوا ولسوالۍ کې د سپاه پاسداران پر یوې سیمه ییزې اډې د امریکا د توغندیزو بریدونو په ځواب کې ترسره شوي دي.

هغوی زیاته کړه چې د دوی د ځواکونو عملیات به تر هغه وخته دوام وکړي چې "د دښمن تېری" دوام ولري.

له دې وړاندې، سپاه پاسداران ویلي وو چې په کویت کې د "علي السالم" او "احمد الجابر" په اډو او په بحرین کې د "شیخ عیسی" په اډه کې ۱۸ مهمې امریکايي نظامي موخې ویشتل شوې دي. د ایران په پوځي بیانونو کې د پیټریوټ سیسټمونو، مخابراتي تاسیساتو او په بحرین کې د امریکا د پنځمې سمندري بیړۍ  د په نښه کولو خبر هم ورکړل شوی دی.

دا پرمختګونه پر جنوبي ایران د امریکا له بریدونو او په تعقیب یې په سیمه کې د امریکا پر نظامي اهدافو د ایران له ځوابي بریدونو وروسته د کړکېچ د چټک زیاتوالي په ترڅ کې رامنځته شوي دي.