بقايي وویل: "دا د انسانیت د تر ټولو معصومو موجوداتو پر وړاندې یو ناوړه جنګي جنایت دی."
ایران د امریکا هغې حملې ته چې تېره شپه یې د اهواز په ښار کې د سرطان د درملنې مرکز 'شهید بقايي روغتون' په شاوخوا سیمه کې کړې، د "جنګي جنایت" نوم ورکړی او سخت غبرګون یې ښودلی دی.
د ایران د بهرنیو چارو وزارت ویاند اسماعیل بقايي په خپله ټولنیزه پاڼه کې د خوزستان ولایت په اهواز ښار کې د روغتون پر شاوخوا د امریکا د برید په اړه څرګندونې وکړې.
بقايي وویل چې د اهواز د ماشومانو د سرطان د درملنې د مرکز 'شهید بقايي روغتون' په نږدې سیمو کې د امریکا د برید له امله روغتون خالي کړای شوی دی. هغه زیاته کړه چې دا برید د روغتیايي مرکزونو پر وړاندې د اسرائیل "وحشتونه" رایادوي.
نوموړي وویل چې د برید له امله په روغتون کې تر درملنې لاندې ۲۱۱ ناروغان په بېړني ډول ایستل شوي دي. هغه وویل: "دا د انسانیت تر ټولو معصومو موجوداتو (هغه ماشومان چې د خپل ژوند لپاره په مېړانې مبارزه کوي) پر وړاندې یو ناوړه جنګي جنایت دی."
هغه نړیوالې ټولنې ته په خطاب کې زیاته کړه:
"هغه کسان چې تل د بشري حقونو نارې وهي، خو پر روغتونونو او روغتیايي مرکزونو بریدونه په قصدي ډول له پامه غورځوي، خپل هر ډول اخلاقي اعتبار یې له لاسه ورکړی دی."
بلخوا، د اهواز د جندي شاپور د طبي علومو پوهنتون په یوه اعلامیه کې ویلي چې د ناروغانو او کارکوونکو د خوندیتوب لپاره له برید وروسته روغتون خالي شوی و، خو نن سهار د ځینو ناروغانو په بېرته ستنېدو سره یې بېرته فعالیت پیل کړی او د ناروغانو منل دوام لري.
