د اوکراین ولسمشر ولادیمیر زیلینسکي وویل: "د روسیې له لوري په جګړه کې حتی د اوربند کومه سمبولیکه هڅه هم ونه شوه." دا په داسې حال کې ده چې د اوکراین هوايي ځواکونو په وروستیو ساعتونو کې د ۵۶ روسي ډرون الوتکو د راغورځولو خبر ورکړی دی. زیلینسکي پر 'ایکس' (پخواني ټویټر) ولیکل: "لکه څنګه چې موږ په تېرو ۲۴ ساعتونو کې وکړل، اوکراین به نن هم د دښمن بریدونو ته ورته ځواب ورکړي."
زیلینسکي زیاته کړه چې روسیې د جګړې په لومړۍ کرښه کې د اوکراین پر سنګرونو د بېلابېلو ډوله ډرون الوتکو "له ۸۵۰ څخه ډېر بریدونه" او له ۱۴۰ څخه ډېر نور بریدونه کړي دي. بلخوا، د روسیې دفاع وزارت ویلي چې د دوی یو اړخیز اوربند له پیل وروسته یې په لومړیو ساعتونو کې ۲۶۴ اوکرایني ډرون الوتکې رانسکورې کړې دي.
اوکراین د روسیې دا لنډمهاله اوربند یو "تبلیغاتي اقدام" بللی چې موخه یې یوازې د می د نهمې د پوځي رسم ګذشت خوندي ساتل دي. دا مراسم د روسیې د مشر ولادیمیر پوتین لپاره یو له خورا مهمو هېوادپالو مراسمو څخه ګڼل کېږي.
د روسیې د اوربند له پیل څو ساعته وړاندې، زیلینسکي د روسیې متحدینو ته خبرداری ورکړ چې په دې مراسمو کې ګډون ونه کړي. هغه وویل: "موږ د ځینو هغو هېوادونو له خوا چې روسیې ته نږدې دي پیغامونه ترلاسه کړي چې وايي استازي یې مسکو ته د تګ پلان لري... په دې ورځو کې دا یو عجیبه غوښتنه ده. موږ یې سپارښتنه نه کوو."
زیلینسکي وړاندې وویل: "دوی له اوکراین څخه د خپل رسم ګذشت د ترسره کولو اجازه غواړي ترڅو په کال کې یو ځل د یو ساعت لپاره په خوندي ډول میدان ته راووځي او بیا بېرته وژنو ته دوام ورکړي."
د روسیې دفاع وزارت په غبرګون کې له اوسېدونکو او ډیپلوماټانو وغوښتل چې د اوربند پر مهال د اوکراین د احتمالي بریدونو له امله له کیف څخه ووځي. د بریتانیا د بهرنیو چارو وزارت دا ګواښونه "غیر مسؤلانه او بې ځایه" وبلل. په ورته وخت کې، د جرمني د بهرنیو چارو وزیر ویلي چې دوی به له کیف څخه خپل ډیپلوماټان ونه باسي او زیلینسکي هم ویلي چې د رخصتۍ په ورځو کې به په پلازمېنه کیف کې پاتې شي.
رسم ګذشت په خطر کې
روسیه هر کال د می په نهمې په 'سور مېدان' کې د دویمې نړیوالې جګړې د بریا ورځ په لوی پوځي رسم ګذشت سره لمانځي. خو په وروستیو اونیو کې د اوکراین له خوا د ډرون بریدونو زیاتوالي په روسیه کې د دغو مراسمو په اړه اندېښنې پیدا کړې دي.
مسکو اعلان کړی چې د نږدې ۲۰ کلونو په جریان کې د لومړي ځل لپاره به په دغه مراسمو کې پوځي تجهیزات (ټانکونه او توغندي) شامل نه وي. د بهرنیو مېلمنو شمېر هم خورا کم شوی دی؛ یوازې د بیلاروس، مالیزیا او لاوس مشران به په کې ګډون وکړي. مسکو همدا راز تر شنبې پورې په ښار کې د انټرنیټ وقفه یي بندیزونه هم پیل کړي دي.
د جګړې د پای ته رسولو خبرې اترې تر ډېره پیکه شوې دي او اوس د ایران او امریکا ترمنځ روان کړکېچ د اوکراین موضوع تر سیوري لاندې راوستې ده. مسکو غوښتنه کوي چې اوکراین باید له هغو څلورو سیمو وځي چې روسیې یې د خپلولو ادعا کړې، خو دا شرطونه کیف ته په هېڅ صورت د منلو وړ نه دي.
