چارواکو د جمعې په ورځ وویل چې د روسیې او اوکراین په متقابلو شپنیو بریدونو کې، چې د دواړو هېوادونو استوګنیزې سیمې او زیربناوې یې په نښه کړې، لږ تر لږه پنځه کسان وژل شوي او ۲۱ نور ټپیان شوي دي.
د سیمې د پوځي ادارې مشر میخایلو سیمیکین په ټیلیګرام کې ویلي چې په اوکراین کې، د روسیې بریدونو د زاپوریژیا په جنوب ختیځ ښار کې یو کس وژلی او پنځه نور یې ټپیان کړي دي، چې پکې یو ماشوم هم شامل دی.
هغه زیاته کړه چې بریدونو استوګنیزې سیمې په نښه کړې او د غیر درسي زده کړو د یوه مرکز ترڅنګ لګېدلي دي.
ښاروال رسلان مارتسینکیف په فیسبوک کې وویل، د لویدیځ ښار ایوانو-فرانکیوسک کې، یو امنیتي ساتونکی وروسته له هغه ووژل شو کله چې د شاهد ډوله ډرون ملبي په یوه غیر استوګنیزه ودانۍ راولویدې.
د اوکراین د کورنیو چارو وزارت وویل، د کیف سیمې په بوچا ولسوالۍ کې، د روسیې برید د ګودام تاسیساتو ته زیان واړاوه او درې کسان یې ټپیان کړل.
ژغورونکو په پیل کې د یوې ښځې د لټون راپور ورکړ؛ داسې انګېرل کېده چې هغه د نړېدلې ودانۍ د خاورو لاندې بنده پاتې وي.
د کیف سیمه ییزې پوځي ادارې مشر تیمور تکاچینکو وروسته وویل چې ژغورونکو د ملبو د پاکولو او په ګودام کې د اور مړ کولو پرمهال د ښځې جسد موندلی دی.
د اوکراین هوايي ځواک پر روسیې تور ولګاوه چې ۱۳۶ ډرون الوتکې یې توغولي دي، چې له دې ډلې ۱۱۴ یې شنډ شوي دي.
پر روسیې بریدونه
د روسیې په بلګورود سیمه کې، د سیمه ییز عملیاتي مرکز د معلوماتو له مخې، د رازومنو پر استوګنځي برید کې یوه ښځه او مېړه وژل شوي او څلور نور کسان، چې یو ماشوم هم په کې شامل دی، ټپیان شوي دي. د راپورونو له مخې، یو کور په بشپړه توګه ویجاړ شوی او د ګاونډي ودانۍ هم زیانمنه شوې ده.
د کالوګا سیمې والي ولادیسلاو شاپشا وویل چې پر زیربناوو په یوه برید کې نهه کسان ټپیان شوي، چې پنځه یې روغتون ته لېږدول شوي دي. هغه زیاته کړه چې په دوو ښاروالیو کې شخصي کورونه هم زیانمن شوي دي.
د روسیې ټکنالوژۍ شرکت یانډيکس وویل چې د بې پیلوټه الوتکې په برید کې د دغه شرکت د معلوماتو د یوه مرکز زیربنا زیانمنه شوې ده.
شرکت وویل چې پرله پسې دویمه ورځ ده چې د دوی د معلوماتو مرکزونه په نښه کېږي. تر دې یوه ورځ مخکې، د پنجشنبې په ورځ، په ساسوفو ښار کې هم برید شوی و.
یاندېکس وویل: "په ساسوو یا کالوګا کې هیڅ کارمند نه دی ټپي شوی." "بیړني خدمات او زموږ خپل متخصصین اوس مهال په ساحه کې دي."
د روسیې د دفاع وزارت وویل چې د دوی هوایي دفاعي سیستمونو د روسیې په سیمو، کریمیا، چې مسکو په غیرقانوني توګه په ۲۰۱۴ کال کې له ځان سره یوځای کړه، او همدارنګه د تور سمندرګي او ازوف سمندرګي په اوږدو کې ۵۰۵ اوکرایني بې پیلوټه الوتکې کشف او ویجاړې کړې دي.
د روانې جګړې له امله د دواړو لورو د ادعاوو خپلواکه تایید لا هم ستونزمن دی.
