د هند اصلي اپوزیسیون ګوند، کانګرس، د دفاع وزیر راجنات سینګ د استعفا غوښتنه کړې او هغه یې تورن کړی چې د "سیندور عملیاتو" پر مهال د اوښتې مرګژوبلې په اړه یې د هېواد پارلمان ته غلط مالومات ورکړي دي.
پر مرکزي حکومت د بریدونو په زیاتولو سره، دغه ګوند د ۲۰۲۵ کال د مې میاشتې په عملیاتو کې د شپږو پوځي منسوبینو د مړینې په اړه د لومړي وزیر نریندرا مودي څخه وغوښتل چې بښنه وغواړي.
د کانګرس د پخوانیو سرتېرو د څانګې رئیس (متقاعد) ډګروال روهیت چوهدري او (متقاعد) وینګ کمانډر انوما اچاریه په یوه خبري کنفرانس کې ادعا وکړه چې د شپږو پوځي منسوبینو — پنځه له هندي پوځ او یو د هند له هوايي ځواک څخه — د مړینې په پټولو سره، حکومت هغوی له خپل حق څخه چې عامه پیژندنه او عزت دی، بې برخې کړي دي.
اپوزیسیون پر حکومت د سیاسي خیانت تور پورې کړ
وینګ کمانډر اچاریه وویل چې پخوانیو حکومتونو به په عامه توګه د هر هغه سرتېري درناوی کاوه چې خپله ځانګړې قرباني یې ورکوله، خو اوسنی حکومت یې د وسله والو ځواکونو په "سیاسي کولو" تورن کړ. هغې وویل: "د مودي حکومت، چې له اردو او سرتېرو څخه سیاسي ګټه اخلي، په وار وار له هېواد او سرتېرو سره خیانت کړی دی."
ډګروال چوهدري د هند پر برحال واکمن ګوند (بي جي پي) تور پورې کړ چې د وسله والو ځواکونو په نوم د رایو ترلاسه کولو لپاره له سرتېرو څخه د یوې وسیلې په توګه کار اخلي. چوهدري وویل: "کله چې دفاع وزیر راجنات سینګ په پارلمان کې درواغ ویل چې هیڅ سرتېری نه دی وژل شوی، د بي جي پي وکیلانو ورته چکچکې کولې. راجنات سینګ د هېواد اردو او سرتېرو ته سپکاوی کړی دی. موږ د هغه د استعفا غوښتنه کوو." نوموړي دا پوښتنه هم راپورته کړه چې ولې د دغو سرتېرو د نومونو په ډاګیزه کولو کې ۱۳ میاشتې وخت تېر شو.
د ګوند د غوښتنو په ترڅ کې، ډګروال چوهدري وویل چې کانګرس به پر خپله رهبرۍ فشار راوړي ترڅو د دفاع وزیر په وړاندې په پارلمان کې د "امتیازاتو څخه د سرغړونې" یو وړاندیز مطرح کړي.
هند د هغو شپږو سرتېرو نومونه چې په "سیندور عملیاتو" کې وژل شوي وو، د ۲۰۲۵ کال د مې میاشتې له شخړې څخه تر یو کال زیات وخت وروسته خپاره کړل. تر اوسه پورې، د هند حکومت په رسمي ډول د دغو کسانو هویت نه و څرګند کړی، که څه هم په ۲۰۲۵ کال کې د هند او پاکستان ترمنځ د څلور ورځنۍ جګړې پر مهال د هندي پوځ د مرګژوبلې په اړه راپورونه ورکړل شوي وو.
