د جنوبي کوریا استخباراتي ادارې د چهارشنبې په ورځ قانون جوړونکو ته ویلي چې شاوخوا ۴۷۰۰ شمالي کوریايي سرتیري د روسیې په ملاتړ د اوکرایني ځواکونو پر وړاندې جګړه کې وژل شوي یا ټپیان شوي دي.

دا ارزونه دوه ورځې وروسته له هغه وشوه چې شمالي کوریا په لومړي ځل تایید وکړ چې د روسیې سره د مرستې لپاره یې جګړه ییز ځواکونه د کورسک سیمې د بیا نیولو لپاره استولي دي. دغه سیمه تېر کال د اوکرایني ځواکونو د ناڅاپي برید په ترڅ کې د روسیې له کنټرول څخه وتلې وه.

د جنوبي کوریا د ملي استخباراتو ادارې (NIS) د پارلمان په یوه تړلې غونډه کې ویلي چې شمالي کوریا په جګړه کې ۴۷۰۰ تلفات ورکړي، چې په کې ۶۰۰ وژل شوي دي. دا خبره د غونډې ګډونوال قانون جوړونکي لي سونګ کوین خبریالانو ته وکړه.

لي وویل چې د NIS په وینا، ۲۰۰۰ ټپیان شمالي کوریا ته د جنورۍ او مارچ تر منځ د هوا یا اورګاډي له لارې ستانه شوي دي. هغه زیاته کړه چې وژل شوي سرتیري په روسیه کې سوځول شوي او پاتې شوني یې شمالي کوریا ته استول شوي دي.

د جنورۍ په میاشت کې،  NIS راپور ورکړ چې شاوخوا ۳۰۰ شمالي کوریايي سرتیري وژل شوي او ۲۷۰۰ نور ټپیان شوي دي. د جنوبي کوریا پوځ تېره میاشت د تلفاتو شمېر ۴۰۰۰ ته لوړ کړ.

د دوشنبې په ورځ، شمالي کوریا اعلان وکړ چې مشر کیم جونګ اون پرېکړه کړې چې ځواکونه د "اوکرایني نازي اشغالګرو له منځه وړلو او د کورسک سیمې د آزادولو لپاره د روسیې د وسله والو ځواکونو سره په همکارۍ" واستوي. د روسیې ولسمشر ولادیمیر پوتین وروسته د شمالي کوریا څخه مننه وکړه او ژمنه یې وکړه چې د شمالي کوریا د سرتیرو قربانۍ به هېڅکله هېرې نه کړي.

کیم او پوتین دواړو وویل چې د شمالي کوریا د ځواکونو استول د دواړو هېوادونو د ۲۰۲۴ کال د دفاعي تړون له مخې ترسره شوي، چې له مخې یې هر اړخ مکلف دی چې که بل اړخ تر برید لاندې راشي، مرسته وکړي. امریکا، جنوبي کوریا او د دوی شریکان وايي چې شمالي کوریا د روسیې د کمېدونکو وسلو د ذخایرو د بیا ډکولو لپاره پراخې دودیزې وسلې برابرې کړې دي. دوی شک لري چې روسیه په بدل کې شمالي کوریا ته پوځي او اقتصادي مرسته ورکوي.

د ۱۰,۰۰۰ څخه زیات شمالي کوریايي سرتیري

امریکا، جنوبي کوریا او د اوکراین چارواکو ویلي چې شمالي کوریا تېر مني له ۱۰,۰۰۰ څخه تر ۱۲,۰۰۰ پورې سرتیري روسیې ته استولي دي. د جنوبي کوریا پوځ د مارچ په میاشت کې وویل چې شمالي کوریا سږ کال شاوخوا ۳,۰۰۰ نور سرتیري روسیې ته استولي دي.

د چهارشنبې په ورځ د NIS په غونډه کې ویل شوي چې روسیې شمالي کوریا ته د هوايي دفاع توغندي، د برېښنايي جګړې وسایل، ډرونونه او د جاسوسي سپوږمکۍ د توغولو ټکنالوژي ورکړې ده. دا خبره بل قانون جوړونکي، کیم بیونګ کي وکړه.

کیم وویل چې د NIS په وینا، ۱۵,۰۰۰ شمالي کوریايي کارګران هم د دوه اړخیزو صنعتي همکارۍ پروګرامونو له مخې روسیې ته استول شوي دي. هغه زیاته کړه چې شمالي کوریا روسیې ته د میلیاردونو ډالرو په ارزښت توغندي او توپخانې ورکړي، خو NIS داسې نښې ندي موندلي چې روسیې شمالي کوریا ته د دې په بدل کې نغدي پیسې استولي وي.