محکمه وايي چې پخواني مشر له پوځي شتمنیو څخه د پیونګ یانګ سره د تاوتریخوالي د راپارولو او د خپل لنډمهاله پوځي حکومت اعلان لپاره د پلمې د جوړولو لپاره کار اخیستی.
د جنوبي کوریا یوې محکمې د جمعې په ورځ پخوانی ولسمشر یون سوک یول په ۳۰ کاله بند محکوم کړ وروسته له هغه چې محکمې وموندله چې هغه په ۲۰۲۴ کال کې د خپل جنجالي پوځي حکومت اعلامیې څخه مخکې د ملي امنیت بحران رامینځته کولو لپاره د پلان د یوې برخې په توګه شمالي کوریا ته د پوځي ډرون الوتنو امر کړی و.
د سیول مرکزي ولسوالۍ محکمې په حکم کې راغلي چې یون غوښتل د پیونګ یانګ له لوري غبرګون راوپاروي او د دواړو کوریاوو ترمنځ کړکیچ زیات کړي، ترڅو د ملکي حکومت د ځنډولو لپاره توجیه برابره کړي.
قاضیانو ویلي چې د ډرون دغه عملیات په قصدي ډول طرحه شوي وو، ترڅو له شمالي کوریا څخه پوځي یا ورته پاروونکی اقدام راوپاروي او داسې شرایط رامنځته کړي چې د پوځي حکومت د اعلان د ملاتړ لپاره وکارول شي.
'ډرونونه د سیاسي ګټو لپاره کارول شوي وو'
د پریکړې له مخې، یون د سویلي کوریا پوځي وړتیاوې په ناسمه توګه د ملي امنیت اړتیاو پرځای د شخصي سیاسي موخو لپاره کارولي.
محکمې وویل چې د ولسمشر واکونه، په شمول د وسله والو ځواکونو قومانده او د پوځي حکومت اعلانولو واک، باید د ملت د ساتنې لپاره وکارول شي، نه د سیاسي ګټو د پرمختګ لپاره.
یون هر ډول ناسم عمل رد کړی او ټینګار یې کړی چې د پوځي حکومت اعلان یې «د هیواد د ګټې لپاره» کړی و. د هغه حقوقي ټیم هم استدلال کړی چې د ډرون الوتنې د شمالي کوریا له لوري د پولې هاخوا د کثافاتو لېږدونکو بالونونو د استولو په ځواب کې ترسره شوې وې.
دا سزا په داسې حال کې صادره شوې چې یون لا هم په توقیف کې دی او د یوې جلا قضیې په تړاو د عمري قید د حکم پر وړاندې استیناف کوي. څارنوالانو د ۲۰۲۴ کال د ډسمبر د پوځي حکومت اعلان د یوه بغاوت په توګه یاد کړی دی.
د سیاسي بحران پایله
د ۲۰۲۴ کال په ډسمبر کې د یون لخوا د شپې ناوخته د پوځي حکومت اعلان سویلي کوریا له ژور سیاسي بحران سره مخ کړه. چې د پراخو لاریونونو او مالي بازارونو ګډوډي یې رامینځته کړه ، خو د پارلمان غړو په څو ساعتونو کې دننه دا پریکړه لغوه کړه.
دا کړکیچ په نهایت کې د هغه له دندې لرې کیدو او د میاشتو سیاسي بې ثباتۍ وروسته د ولسمشر لی جای میونګ د ټاکنې لامل شو.
د ډرون عملیات د کوریا ټاپووزمې په اړه لا هم یوه حساسه مسله ګڼل کېږي، چیرې چې شمالي او سویلي کوریا په تخنیکي توګه په جګړه کې پاتې دي او نظامي تاوتریخوالی دوام لري.
