سخت دریځه نوماند جورج سیمیون د یکشنبې په ورځ د رومانیا د ولسمشرۍ ټاکنو د بیا ترسره کېدو په لومړي پړاو کې په لوی توپیر بریا ترلاسه کړه.
د رومانیا د دایمي ټاکنو ادارې په وینا، د رومانیایانو د اتحادیې (AUR) نوماند، سیمون، د ۹۸ سلنې څخه زیاتو رایو په شمیرلو سره له ۴۰. ۲ سلنې څخه ډیرې رایې ترلاسه کړې.
د هغه وروسته د پلازمینې بخارست منځلاري ښاروال، نیکوسور دان، د ۲۰. ۸ سلنې څخه په زیاتو رایو سره دویم ځای خپل کړ.
د واکمن ټولنیز ډیموکراټ ګوند منځلاري نوماند، کرین انتونسکو، د نږدې ۲۰. ۵ سلنې رایو سره درېیم ځای خپل کړ.
څرنګه چې هېڅ نوماند د ۵۰ سلنه جمع یو رایو اړین اکثریت ترلاسه نه کړ، نو په هېواد کې به د مې په ۱۸مه نېټه د ټاکنو دویم پړاو ترسره شي.
۳۸ کلن سیمیون د خپلو لانجمنو څرګندونو لپاره پېژندل کېږي، چې هغه سخت ملتپاله او د اروپایي اتحادیې ضد نظریات څرګندوي.
د ۲۰۲۴ کال د نومبر په ۲۴مه نېټه، رومانیا د ولسمشرۍ ټاکنو لومړی پړاو ترسره کړ، چې د سخت دریځه او روسیې پلوه نوماند کالین ګورګیسکو په بریا پای ته ورسېد.
خو د رومانیا اساسي قانون محکمې د ټاکنو پایلې او د ډسمبر په ۸مه نېټه پلان شوې دویم پړاو ټاکنې لغوه کړې، په دې دلیل چې د ټاکنو پروسه د روسیې په ملاتړ د ګورګیسکو په ګټه لاس وهنه شوې وه.
