د اندونیزیا په لویدیځه جاوا ټاپو کې د رېل ګاډو ټکر په پېښه کې ۱۴ تنو ژوند د لاسه ورکړی دی .
د بکاسي ښار د رېل پټلۍ په یوه لاره کې د ټکسي ټکر د داسې پېښو لړۍ پیل کړه چې له امله یې یو مسافر وړونکی رېل ګاډی پر پټلۍ ودرېد او وروسته له یوه بل لیرې مزلي رېل ګاډي سره وجنګېد. په دې خونړۍ پېښه کې په لسګونو نور کسان ټپیان شوي هم دي.
د اندونیزیا دولتي رسنیو د سې شنبې په ورځ د چارواکو له قوله خبر ورکړ چې د لویدیځه جاوا ولایت په بکاسي ښار کې د دوو رېل ګاډو د ټکر له امله د وژل شویو شمېر۱۴ ته لوړ شوی او ۸۴ نور ټپیان دي. دا په وروستیو کلونو کې د دغه هېواد د رېل پټلۍ یوه له تر ټولو خونړیو پېښو څخه ګڼل کېږي.
د "انتارا" خبري اژانس د راپور له مخې، دا پېښه د دوشنبې په ناوخته د ختیځ بکاسي په سټېشن کې هغه مهال رامنځته شوه چې یو سیمه ییز مسافر وړونکی رېل ګاډی له یوه لیرې مزلي رېل ګاډي سره وجنګېد.
د اندونیزیا د رېل پټلۍ د دولتي شرکت (PT KAI) چارواکو ویلي چې لسګونه ټپیان په بېلابېلو روغتونونو کې تر درملنې لاندې دي. د دغه شرکت ویاند "فرانوتو ویبوو" وویل، پېښه هغه مهال پیل شوه چې یو ټکسي د بکاسي په "بولاک کاپال" سیمه کې له یوه برقي مسافر وړونکي رېل ګاډي سره ټکر وکړ.
له دغه ټکر وروسته، مسافر وړونکی رېل ګاډی خراب او پر پټلۍ ودرېد. لږ ځنډ وروسته، یو بل لیرې مزلی رېل ګاډی چې په همدې کرښه روان و، له دغه ولاړ رېل ګاډي سره په زور سره وجنګېد. د ملي پلټنې او ژغورنې ادارې په ګډون بېړنیو ډلو ټوله شپه د قربانیانو د ایستلو لپاره کار وکړ.
چارواکي وايي چې د وژل شویو کسانو جسدونه د پېژندنې لپاره د پولیسو روغتون ته لېږدول شوي دي. همداراز اعلان شوی چې د ټولو قربانیانو طبي او د جنازې لګښتونه به حکومت پر غاړه اخلي او د کورنیو سره د مرستې لپاره ځانګړي معلوماتي مرکزونه جوړ شوي دي.
اوسمهال په سیمه کې د رېل ګاډو تګ راتګ تر یوې اندازې ګډوډ شوی او پلټونکي د پېښې د دقیق لامل په اړه څېړنو ته دوام ورکوي.
